بقلم : خالد حبيب ,, اعتقادي المتواضع ان حسن حمدي في الأهرام خير ممثل لعصر مبارك. الفساد المقنن و استغلال ثغرات القانون و التربح. لكن التاريخ و الواقع بيقول انه هو و غيره عمرهم ما نقلوا أي فساد أو نموذج سيء جوه النادي الأهلي.
و اعتقادي المتواضع بيقول ان طاهر ابو زيد راجل شريف و نضيف. لكن أفعاله و قراراته بتدي صورة مرعبة عن انعدام الخبرة و اندفاع الغرض و التسرع لدرجة اغفال البديهيات. من أول بيان خايب كوميدي عن أسباب اقالة المجلس مش هيعدي من أول قاضي في محكمة الأسرة، و مليان ايحاءات مبتذلة بتربط بالثورة و الاخوان، مع نادي وقع أقسى عقوبة على لاعب في التاريخ عشان خاطر عيون الثورة، و من أول اختيارات عشوائية في مجلس مؤقت ما بين راجل فوق التمانين يمسك أكبر نادي في القارة، للاعب متقاعد نموذج عبقري للفشل الاعلامي و الكروي و الحقد و الكراهية للجميع، و كمان أكبر نموذج فلولي ضد الثورة و البلد، لوالد مشجع مات في بورسعيد، لمشجعين متحمسين، بدون أي مراعاة لقواعد تشكيل كان دايما بيجمع ما بين الخبرة الرياضية و الاقتصادية و الشخصيات العامة و القامات الأكاديمية و القانونية. و عشان كده كان بيكسب كل انتخابات. لأنه ببساطة كان تشكيل و خطة مع، مش ضد.
طبيعي يكون في أغراض و قلة خبرة و ثأر شخصي، لكن مش قادر أستوعب ازاي يكون معاها اندفاع و انعدام ذكاء و صفر تفكير عملي. انك تحاول تهد النموذج الرياضي و الاقتصادي و الشعبي الناجح الوحيد في بلدنا، في نفس الأسبوع اللي بيحصل فيه على ألقاب أفضل لاعب و أفضل فريق و أفضل نادي، و في نفس الأسبوع اللي نفس المجلس بيفضح عورات الجهل و الخيبة الحكومية بأنه يعمل عقد بث مباريات فردي بقيمة أعلى من نص قيمة عقد البث الجماعي لكل الأندية، و في نفس الأسبوع اللي نفس الوزير بيفتح جبهة قتال مع شخصية مصرية عالمية ترأس الاتحاد الدولي لكرة اليد بقاله سنين، و هو لسه كمان مغروس في معركة خاسرة مع اللجنة الأوليمبية الدولية و المصرية بسبب جهل مطلق بالقواعد و القوانين و اللوائح. و لما البصيرة تغيب، يكتمل الفشل بتعيين قيادات اما مغمورة أو عاجزة، بدل الحل الخبيث بتعيين مجلس قوي يطمن الناس و لو لحين. مش تونس و بقدونس.
حاجة تكسف. و اللي يكسف أكتر ان قرار جماهيري زي ده يؤخذ من غير مراجعة من رئيس وزراء. الصلاحيات حلوة، بس في القرارات الجماهيرية ليها ألف حاجز للمراجعة و التصحيح. كفايانا عشوائية و بهدلة. مش هتعدي بسهولة ، حتى لو أبواق الاعلام المعتادة مسكت في اللبانة الجديدة و حولت الأهلي عدو للبلد. مش هتنفع. الأهلي قلب البلد. و ان شاء الله الأهلوية هيكسبوا. بالعقل و المنطق و الحق. بس خسارة الوقت و الطاقة و المجهود. تعبنا من الهواة..
