بعد إغلاق الحكومة الفيدرالية الأمريكية بشكل مؤقت نتيجة لعدم موافقة الكونجرس على الميزانية المقدمة له من الحكومة، 800 ألف موظف فيدرالي وظائفهم غير ضرورية مش هيقبضوا مرتبات و مش هيروحوا الشغل من أصل 2.7 مليون موظف.
http://edition.cnn.com/2013/10/01/politics/government-shutdown/index.html?hpt=hp_t1
تصور أن أكبر اقتصاد فى العالم (17 تريليون دولار) و رابع أكبر دولة فى العالم سكانا (315 مليون)، عدد الموظفين الحكوميين فيها 2.7 مليون فقط لاغير، ولو ضفنا لهم العاملين بالجيش الأمريكى (أقوى جيش فى العالم) من ضباط و جنود هيبقى 4.4 مليون شخص فقط لاغير!
عندك هنا فى (مصر)، اقتصاد حجمه (250 مليار دولار)، يعنى الاقتصاد الأمريكى ضعفه بحوالى 70 مرة، ، و دولة عدد سكانها (85 مليون)، و مع كده عدد الموظفين الحكوميين حوالى 6 مليون شخص، و معرفش هل ده بيشمل المجندين فى الجيش المصرى إجباريا سنويا و لا لأ!
، رئيس أغنى و أقوى دولة فى العالم مش هيلاقى فلوس يصرفها و هيقفل الدكانة و يرش ميه! حكومات دول العالم الأول الغبية بقى.
المعيشة فى دول العالم الثالث نعمة برضه، أنت صحيح متعرفش الفلوس بتيجى منين و بتروح فين و معدلات الفساد المالى و الإدارى للركب بس الحكومة مبتقفلش. الحكومة أساسا بتتكون من ملايين البشر اللى مبيعملوش أى حاجة نافعة فى حياتهم غير إنهم يقللوا عدد العاطلين فى الأوراق الرسمية. الشعب كله يقفل و ينام من الساعة 7 بس الحكومة الأم الحنون تظل ساهرة تحافظ على أمن المواطنين.
الجهاز الحكومى المصرى المتضخم اللي كل سلطة حاكمة بتقدمله هبات و عطايا على حساب زيادة عجز الموازنة و ارتفاع معدلات التضخم علشان تحمى نفسها، المفترض يتم تقليصه ل2 مليون موظف فقط لاغير، أما ال5 أو 4 مليون الباقيين يروحوا يشوفوا شغلانة نافعة منتجة.أصحاب الورش و المحلات الصغيرة بيفيدوا البلد دى أكتر من وكلاء الوزارات.
