 |
| قرار الحد الأدنى |
من حق اليسار الإحتفال الأن بإنتصار الشعب، و إن كان بعضهم شايف أساسا رقم 1200 غير كاف و بيتكلم عن 2000 جنيه!
بس يظل السؤال المهم، لو الكلام ده هيتم تطبيقه فعلا و مش مجرد طلقة فى الهواء، الحكومة هتموله إزاى؟!
إجراءات تقشفية و رفع الدعم؟ و لا هتطبع و خلاص و بالتالى التضخم هيأكل الزيادة؟ و هيتم التعامل إزاى مع القطاع الخاص إذا كان رجال الأعمال كانوا معترضين اساسا على رقم 800 الأولانى؟!
رئيس الوزراء يقول : الحد الأدنى 800 جنية و الحكومة لا تملك موارد لزيادتة عن هذا الحد, يهاجم الرجل و يتبهدل لأن الرقم قليل, بعدها ب48 ساعة نفس رئيس الوزراء يقول الحد الأدنى سيكون 1200 جنية فبرضة يهاجم لأن دة قرار غير مخطط و توقعات التضخم قد تكون قاسية جدا !!!!!!!!!!!!!
بس بصراحة الموضوع بسيط جدا, إلى أن تحدد الحكومة كيف ستمول الزيادة سواء بتقليل الدعم أو زيادة الضرائب أو طبع فلوس جديدة "طبعا طريقة تمويل الزيادة هى الطريقة الوحيدة لمعرفة هل سيؤدى القرار لزيادة دخول فقراء الحكومة أم زيادة فقرهم" إلى أن تضح الصورة توجد مجموعة من الاسئلة الأولية البسيطة :
- صناعة النسيج و التصنيع الزراعى فى الصعيد "كثيفة العمالة" التى تدفع مرتب للعامل حوالى 900 جنية و مكسبها لا يتجاوز ال5%, يا ترى كيف ستتعامل مع العمال الذين سيطالبون بأن يتم مساواتهم مع الحكومة, هل سيغلقون مصانعهم أم سيقبلو مطالب العمال و ربك يسهلها فى الربحية؟
- يا ترى أخبار صندوق التامينات هل توجد بة اموال لتغطية زيادة المعاشات؟ أم أن هذة معضلة تأثيرها سيظهر بعد سنوات فممكن تجاهلها الأن؟ لكن من هو على المعاش الأن هل سيحاسب على معاش مرتبة حين غادر الوظيفة أم مرتبة المرتفع الذى تم تعديلة الأن ؟
- ماذا لو رفضت شركات القطاع الخاص تحديد حد أدنى 1200 مثل الحكومة و صار لأول المرة الحكومة تعطى للوظائف الإبتدائية مرتب أكبر من القطاع الخاص؟ أى تصور عن غضبة العمال فى القطاع الخاص أو هجمة الناس طلبا لوظيفة فى الحكومة ؟
- طبعا معضلة بسيطة عن حوالى نصف مليون إنسان يعملون بعقود مؤقتة "نظافة سعاة و أمن و خدمات" و مرتباتهم لا تزيد عن 400 جنية, هل ستقبل الحكومة طلبهم أن يتم تثبيتهم ليحصلو على 1200 جنية أم ممكن تأجيل طلبهم ؟
- برضة نفس عمال النظافة و الصيانة و الأمن فى القطاع الخاص ومرتباتهم لا تزيد عن 500 جنية , هل سيطمحون ل1200 جنية و كيف سيطالبون بها؟
- طب ينفع شباب الخدمة العامة بتوع 4 جنية فى الشهر يحصلون على 4 جنية و زميلهم فى الحكومة بياخد 1200 جنية؟
للأمانة أول قرار ثوررجى جرئ سريع من الحكومة, و كعادة مثل هذة القرارات ليس أمامك إلا إنتظار التبعات و التعامل معها فى وقتها, هااااااااااااااا, لكن أمانة ربنا يكون فى عون أى صاحب مسؤلية الأن.
قرار الحد الأدنى لأجور موظفي الحكومة ده حسسني إن ال 6 مليون طفيلي إللي شغالين في الحكومة ولا ليهم أي لازمة بيبلطجوا على الناس المنتجة وبياخدوا من دخلهم بالعافية في مقابل إنهم ما يعملوش مشاكل. وطبعا النهب ده بيتم بمساعدة اليسار.
عايزك تتخيل مدام عفاف بتاعة الأرشيف دي بتعمل إيه علشان تاخد ١٢٠٠ جنيه؟ تخيل واحدة زي ينفع تعملها تدريب على أي حاجة غير تخريط الملوخية؟!
احنا موظفي القطاع الخاص عايشين تحت خطر دائم إننا نقعد في بيتنا ودايما بنحسن من مهاراتنا علشان ننمي كاريرنا، ودايما بنشتغل أكتر من 40 ساعة في الأسبوع، وبنعمل معظم الدخل القومي، وبيتاخد من دخنا ضرايب مش علشان نلاقي قصادها خدمات، لأ علشان تتصرف على النهب الاجتماعي ده!
بقلم : مالك سلطان , مصطفي بدر , بهاء زيدان
