وهم الحياة في اوروبا عند المصريين و العرب

عندنا تخيل ان اوروبا الشعب كلة غني و متدلع و بيعوم في فلوس و عيشتة مرتاحة.
لكن الكلام دة بعيد عن اي حاجة ليها علاقة بالدول الغربية.في الحقيقة في مصر اسهل بكتير انك تكون عايش مرفه اكتر من أوروبا بمراحل و ممكن انت دلوقت في مصر تكون فعلا مرفة اكتر من الاوروبي.
في اوروبا مفيش حد الست الوالدة تقدر تجيبة يروق البيت عشان هتاخد مرتب ابوك كلة للترويق دة
مفيش محلات و مطاعم بتفتح بعد الساعة 9 او 10 بليل بالكتير. (الا قليل جدا)
مفيش حاجة اسمها دليفري من اول السوبر ماركت لحد الشاورمة زي في مصر
مفيش حاجة اسمها مواصلات 24 ساعة بالبركة كدة (هو باص ليلي لبعض الاماكن بس)
انا شخصيا عمري ما شفت حد معاة خطين تليفون في اوروبا
المقصود ان الافلام الي اغلب الناس بتاخد منها فكرتها عن الغرب ان الشاب امور و معاة مزة جامدة و بيت كبير و الكلام دة الCopy بتاعة افلام هاني سلامة في مصر
انت هتعيش في اوروبا كويس و كويس جدا بس مش بافترى.
الفكرة كلها ان في حاجة اسمها (من حقك تبقى غني لكن من حق الفقير يعيش محترم) بمعنى ان الكل تقريبا عايش في نفس المستوى مع مراعاة الفوارق و الامكانيات يعني لو انت غني هتعيش بشكل الاغنية الي هو عندك فيلا و عندك عربيتين وبتسافر كتير مش زي عندنا في مصر الغني عندة 15 فيلا و 12 عمارة و 10 شغالات و 12 عربية و كمان مش عاجبة يقوم يشتري عقارات برة مصر! و طبعا كل ما هو يغتني الفقراء تزداد فقر و تلف الحلقة. و العجيب كمان ان في مصر الفقير هو الي بيدفع ضرايب من مرتبة و الغني بيتعالج على تكلفة الدولة.

تابع القراءة

ازاي تمهد نفسك للسفر خارج مصر اثناء الدراسة بالجامعة

عد سؤال اتكرر كتير هو اعمل اية و انا في فترة الجامعة عشان اقدر (اسافر-احسن مستوايا المادي-اقدر الاقي شغل بسهوله اكتر بعدين)
لازم تعرف ان اكبر غلط انك تبقى مدلوق في الجامعة على الامتحانات طول السنه لعدم مقدرتك على تنظيم وقتك و كمان في الصيف اخرك تروح تدريب اهبل ملوش لازمة عشان تخلص ضميرك و خلصت.
فترة الجامعة بالنسبالك هي الفترة الي تقدر تحدد فيها مكانك في المجتمع بعيد عن مستوى اهلك شكلة اية و دي الفترة الي تقدر تحدد فيها هل فترة شبابك هتكون كلها ملل و فشل ولا بداية تجربة ناجحة. دي حجات انا شخصيا كنت لازم اعملها كل يوم و ليها وقتها و كنت بعتبرها من البرنامج اليومي.
-اتعلم ادارة الوقت: كل واحد فينا عندة 24 ساعة في اليوم و على المدى الطويل لو استغلتهم صح هتلاقي الناس بتسألك (انت اتعلمت الكلام دة كله امتى؟)
-اعمل عمل خير مهما كان صغير كل يوم. مثال: شير الكلام دة لأي طالب جامعة تعرفة. دة عمل خير
-قعدتك على فيسبوك لازم يكون ليها حدود... اظن الرسالة وصلت
-عود و علم نفسك مهارة البحث عن المعلومة. متنتظرش حد يفهمك كل حاجة لحد عندك.(اول تجربة انك تدور على كل الكلام الي انا كاتبه دة و تعرف تطبقة ازاي)
-كل يوم افتح مقالة جديدة او بحث و يفضل ميكنش في مجال دراستك لكن في مجالات متنوعة جدا و متسبش يوم غير لما تعرف اي معلومة جديدة. (تخيل بعد 3 سنين هيكون عندك اكتر من 1000 معلومة مكنتش تعرفها)
-كل شهر دور على شخص واحد (على الاقل) يكون اكبر منك في السن و في المستوى سواء في الشغل او الدراسة او ماديا و اعزمة على اكل برة و اقعد اتكلم معاة و اتعلم منة و في الاخر((ادفع الحساب)). الشخص دة عمرة ما هينساك و هيساعدك بعدين في اي وقت و على مدى كويس هيكون عندك شبكة علاقات قوية تقدر تعتمد عليها.
-اللغة اللغة اللغة مهمه جدا و متستكبرش نفسك انك تتعلم (هنزل كلام مخصوص لأهمية اللغة و ازاي تتعلم)
-ابعد عن اي مشاكل او خناقات او حجات مفيهاش فايدة ليك و دي متضمنة اي حد من صحابك بيحب يلعب ادوار امينة رزق.
-سواء معاك فلوس أو لا عود نفسك تقلل كمية متتطلباتك و حاول تنزلها للنص أو الثلث و دة مش بخل بس دة عشان تتعلم ازاي تتعامل في المواقف الصعبة.
-متسبش فرصة تتعلم فيها حاجة أو تعمل فلوس من حاجة (مشروعة) غير لما تجربها و تعملها و متتكسفش انك اشتغلت و صحابك بتتفسح و الكلام دة عشان صاحبك الي يتريق عليك عشان بتشتغل ميبقاش صاحبك و في المستقبل هيكون بيحقد عليك من الي هتوصلة. صاحبك هو الي يشجعك و لو شاف فرصة يقولك عليها.
-ابعد/ي نفسك عن الدراما و الحكايات الي ملهاش لازمة و حط في بالك ان حتى روميو و جوليت متجوزوش و لو اتجوزو كانو اتطلقو ولا راحو في داهية. ركز على شغلك.
-وقت الفسح او الراحة دة تستمتع بية بأكتر تريقة تخليك مبسوط و فرحان و كل حاجة في الدنيا مش انك تقعد نفس القعدة مع نفس الناس مبتعملش اي حاجة حتى ممتعة. في الاول و في الاخر انت بتشتغل كل دة عشان تكون مبسوط في حياتك.
-اتعلم Sales أو القدرة على البيع مهما كان مجالك الاساسي مهارة البيع بنحتاجها في الحياة اليومية مش الشغل بس (ممكن ابقى اعمل كورس في مصر للموضوع دة بس مش دلوقت ابتدي انت و ربنا يسهل)
عايز تقضيها بالصياعة و تنجح بالهيصة صدقني انا اكتر واحد كان ممكن اعمل دة بس الطريق دة مبيأكلش عيش عايز تنجح بجد اعمل زي ما الناجحين بتعمل.
دي حجات لو اتعلمتها زي ما قلتلك كدة مش بس هتسافر لكن هتكون انسان ناجح سواء في مصر او برة مصر. و انا بقول الكلام دة عن خبرة جرب أول شهرين الكلام دة و شوف اية الي هتقابلة في طريقك و عايز ابقى اسمع منك.
‫

تابع القراءة

عن السفر للخارج

بالنسبة للناس الي خلاص مش عايزة تسافر عن طريق التعليم و عايزة تشتغل و تجرب الحياة برة مصر.
انا عايز اقولهم حاجة ممكن كتير ميكنش فاهمها أو حتى مش هيقتنع بيها لكن كل واحد حر في رأية.
شخصيا انا اتعلمت حاجة انا بعتبرها من الحجات الي ساعدتني كتير في طريقي.
انا أول ما قررت اسافر كان نفسي اطلع على امريكا في NY على طول أو اروح اعيش في لندن و كنت برتب كل خطوة على الاساس دة.
بعد ما بدأت اسافر اماكن تانية منها برلين و باريس و هونج كونج و مدريد لقيت ان اكبر غلط ممكن واحد يعملة انة يروح من اولها لمدينة كبيرة لسبب بسيط ان المدن الكبيرة صحيح فيها فرص اكتر لكن المنافسة فيها اصعب بكتير لأن وارد جدا انك تلاقي حد بضعف حجم مؤهلاتك و مستعد يشتغل بنصف مرتبك. و بالنسبة ليا كواحد مكنش معايا فلوس ولا مؤهلات قوية الموضوع كان في منتهى الصعوبة ان مكنش مستحيل...طبعا بستر ربنا و بمجهود خيالي قدرت اصلح الموضوع و بعدها قررت اني هبعد عن المدن دي لحد ما اكون قادر على المنافسة القوية و بعدها الحمد لله دة حصل.
طبعا لو انت معندكش مؤهلات تميزك عن بقيت الناس بفارق واضح هتلاقي الموضوع صعب.
الفكرة بالنسبة للناس الي عايزة تشتغل انا شايف انك تستغل عقدة الخواجة الي عند بلاد تانية و تروح هناك و تبقى عايش مبسوط افضل ما تروح مدينة عالمية و تبقى حاساس انك في قاع المجتمع.
في مصر للأسف عندنا مفهوم ان لو واحد من مصر راح قعد في مدينة صغيرة في الصين مثلا أو الهند أو افريقيا بتفضل تتريق علية و تقول اية الي موديك هناك و في الغالب هو بيضحك و يقولك نصيب بس الفكرة ان الراجل دة ممكن يكون عايش مبسوط اكتر من واحد عايش في لندن بس في بدروم عمارة.
الاجانب الي بتيجي تشتغل في مصر بتكون عايشة مبسوطة لأنهم بيكون ليهم الاولوية في حجات كتير. الموضوع دة مش بس في مصر لكن في دول تانية كتير. متفكرش في اسم بلد تعيش فيها لمجرد المنظرة الكدابة لكن شوف بلد تقدر تعيش بجد مبسوط من غير ضغوط انت في غنى عنها. و لما ربنا يكرمك و تبقى حاجة كبيرة روح المدن الكبرى و عيش هناك بس لازم تاخد الطريق من الاول. من الاخر خليك برنس في اختياراتك و فكك من رأي الناس
الموضوع دة مهم بالنسبة لناس كتير و يا ريت لو حد عندة رأي يعلق بية المهم يكون رأي مفيد.

تابع القراءة

ازاي تكون تكون Open minded ؟

في ‫‏مصرنا‬ العزيزة مفهوم OpenMinded أو انك منفتح مفهوم عجيب جدا
يعني في مصر لو انا قلت على بنت انها Open Minded دة بيدل على انها مقضياها حقن و برشام أو عندها 12 ورقة عرفي.
و لو قلنا دة على ولد هيتفهم انة يا.. ديلر يا... حاجة تانية.
معنى المصطلح دة اصلا و عشان تكون منفتح يعني انك بتقبل الشخص الي قدامك مهما كان شكلة أو اسلوبة أو لهجتة أو لبسة.
يعني مينفعش انتي تقولي انك Open minded و تتريقي على واحدة لابسة خمار في الجامعة معاكي و eww دي فلاحة.
أو انك تقول انك منفتح و تقعد تشتم في اي واحد ملتحي أو واحدة منتقبة و تقول هما دول سبب خراب البلد.
و على الناحية التاني اصلا الاسلام دين Open minded و دة بجد من اعظم القيم الي عندنا في الدين انك مش مطالب انك تجبر حد على حاجة و دة برضة في باقي الاديان ان لازم تقبل غيرك. اسلوبنا المريض هو الي شوة الفكرة دي و خلى جوة كل واحد داعشي صغير. يعني انت لو انسان بتعتبر نفسك ملتزم مينفعش عشان في واحد أو واحدة مختلف عن طريقتك تقلب عليهم و خد عندك تريقة و تكفير الخ..
في بنات منتقبة و Open minded و في شباب ملتزم و زي العسل ولله و على العكس طبعا موجود. متاخدش بالشكل عشان متنكش انسان سطحي ساذج.
الفكرة كلها ان معنى الكلمة دي هي انك بتتعامل مع انسان و الانسان من حقة عليك انك تعاملة باحترام مهما كان فكرة. ساعتها تقدر تكون Open minded

تابع القراءة

‫ ‏الجامعات الخاصة‬ سبب رئيسي لفساد النظام التعليمي في مصر

بقلم :Ahmed Mostafa ...  انا احد الاف الناس المتضررة من ‫ ‏الجامعات الخاصة‬ و هم سبب رئيسي لفساد النظام التعليمي في مصر. بصراحة انا مكنتش عايز اتكلم في الموضوع دة لكن الحق مفيش احسن منة. و المتضررين مش بس الي في الخاص لكن انت في التعليم الحكومي متضرر اكتر.
((طلب من كل المظاليم تنشر الكلام دة و يا ريت لو تكتب قصتك في التعليق عشان غيرك يفهم)). grin emoticon
الجامعات الخاصة في مصر هي الي بتضغط على وزارة التعليم العالي عشان تقلل عدد الطلاب المقبولين في الجامعات الحكومية. و دة بيخلي عدد الطلاب الي طلع عينهم في ثانوي ملهمش مكان في الجامعات الحكومية و يقع الطالب و أهلة على حجر الجامعات الخاصة.
-تدخل عدد زيادة للطلبة و اهة زيادة الخير خيرين.
-تزود المصاريف كل سنة أو تجبرك انك تدفع بعملة اجنبية.
-تلاقي انك مضطر تدخل دروس هيكلفك مصاريف زي مصاريف الجامعة.
-هتدخل في مجتمع (أغلبة) سطحي و رغم انة في اغلى الجامعات لكنة جاهل.
-الجامعة عايزة الطالب يروح الجامعة زي النادي أو يكون (كمثل الحمار يحمل اسفارا)
-عشرين الف وعد هتلاقية من الجامعة قبل ما تدخل لكن أول ما ياخد ملفك بقيت عبد عندهم
-مفيش قيمة أو خوف على مستقبلك مهما حاول انة يقنعك انة مهتم بيك دايما مصلحتة اولا.
-لو اعترضت مفيش اسهل من ان مستقبلك يضيع في جرة قلم.
-اي جامعة تقولك احنا عندنا شراكة بجامعة whateverbullshit دي ناس بتشتغلك عشان الشراكة دي معناها انك ممكن تحول من عندك لعند الجامعة التانية في اي وقت (مهما كان تقديرك) و دة الي انا شفتة هنا في أوروبا و لما كنت في اسيا.
و بما اننا داخلين على موسم تقديم  انا قررت بما اني معرفتش اخد حقي زمان انا قررت هخسرهم زباينهم..الطلبة الي هتقدم لجامعات خاصة تسافر افيدلهم.
عشان كدة قررت اني هعمل حملة لاقناع الطلبة الي داخلة تعليم خاص انها تروح بلاد بتكلف نفس المصاريف و تبعد عن مافيا التعليم في مصر  و ربنا يستر علينا.
هجبلك جامعات برة مصر تقريبا بنفس اسعار الحامعات الخاصة في مصر و يمكن اقل. بلاش تلبس الخازوق الي غيرك لبسة عشان ملقاش حد ينصحة. انا لما حسيت بالظلم في الجامعة عرفت ان مفيش طريقة الطلبة تاخد حقها غير انهم يقاطعوهم. قبل ما تظلم نفسك و أهلك معاك فكر في الموضوع كويس. انا مليش مصلحة غير اني كنت بتمنى حد ينصحني زمااان يمكن ربنا هيكرمني عشان بنصح غيري.
للاهالي: لو فعلا انت عايز افضل حاجة لأبنك ابعدة عن الجامعات الخاصة عشان حضرتك حرفيا بترمي فلوس في الارض. و تعمل عاطل بس شيك حبيتين

تابع القراءة

تعلم ‫‏التسويق‬ من تاجر المخدرات في 3 دقائق

بقلم : Ahmed Mostafa ... لو عايز تتعلم تسويق لازم نشوف تاجر المخدرات بيعمل ايه و تتعلم منه :
-الديلر من اشطر الناس في تسويق بضاعتة لأن لو معرفش يجيب (Target Audience) هيروح في داهية grin emoticon
-الديلر عمرة ما هيخليك تدفع من أول مرة لازم يخليك تجرب عينة أو تعمل (Test Drive)
-الديلر عندة رد لأي حاجة الزبون بيقولها أو بيسألها (Product knowledge)
-الديلر بيحاول يحسسك انك من اهم الناس عندة و ممكن يطمن عليك لو مكلمتوش (Rapport)
-الديلر لو شايف انك جديد في الموضوع بيعلمك ازاي ترول صح من غير ما يحرجك (Customer education)
-الديلر بيتكلم عن سمعتة و ازاي هي زي الجنية الدهب (Branding)
-لازم الديلر بيكون لية كبير أو ناس تقيلة يعرف يتحامى بيهم في وقت المشاكل (Corporate relations)
-الديلر ممكن يسلفك لو ممعكش فلوس و عندة طريقتة انة يرجع فلوسة لو حكمت. (System)
-الديلر بيتابع الاخبار عشان يعرف ينزل اكتر في السوق ولا يهبط فترة لحد الموجة ما تعدي.
-الديلر عارف قيمة البضاعة الي معاة لكن برضة عارف قيمة كل زبون عندة و وزنة قد اية في السوق grin emoticon
-الديلر ديما بيسأل اية تقييمك للمرة الي فاتت (After sales relation.)
-الديلر مش بيقول اسرار الشغلانة لحد عشان يفضل عندة ال(Know-How)
-الديلر بيحب دايما يعرف لو في حاجة جديدة في السوق أو منافس جديد (Market research)
-الديلر يقدر يفكر ازاي يعوض خسارتة لو في بضاعة خسرت معاة.
بتحبه أو لا ..لازم نتفق ان الديلر اكتر واحد شايف شغلة في البلد و دة المطلوب اننا كلنا نعملة في شغلنا grin emoticon
لو عايز تعرف انت بتاع تسويق شاطر ولا لأ تخيل انك ديلر و شوف اسلوبك في التسويق هيبيع ولا هتضيع

تابع القراءة

تقرير عن فيلم Avengers: Age of Ultron

بقلم : ايهاب عمر ... هو هيجيب فلوس و هيبقا فيلم ناجح من ناحية صندوق الايرادات .. و لكن من المؤكد ان الحديث سوف يستمر طويلا حول الاسباب الذى جعل الفيلم فى مستوي غير الذى توقعناه ..

من وجهة نظري الشخصية الموضوع كله بسبب انها وسعت منهم تحديدا فى جزئية محاولة ربط كل السلاسل ببضعها البعض .. و التمهيد لاجزاء اخري للسلسلة بل و لسلاسل اخري لدرجة ان التمهيد كان الابرز فى الفيلم و الصراع مع الشرير كاد ان يصبح امرا ثانويا ً .. و التركيز على التمهيد خلى الشخصية الشريرة فى العمل بدورها باهتة رغم ان التحدي الاكبر لما تفعل فيلم بيجمع بين كل الابطال دول انه يكون فيه ضرورة لتجمعهم بالاساس ..

و اخيرا الخلفيات النفسية اللى بدا ظهورها على بعض الابطال فى الجزء دا مكنتش مقنعة بدورها .. كان لازم يتفرد لها مساحات اكبر باسلوب افضل خصوصا ان الاصل ( الرواية المصورة ) عالجت الموضوع دا كويس قوي ..

ختاما ً زي ما قلت انا بدات اقتنع ان فكرة ربط السلاسل و كل الابطال ببضعهم البعض فكرة هتؤثر على سلاسة العمل نفسه .. انتا دلوقتي محمل بخطوط درامية تتعلق بخمس سلاسل سينمائية ، مالهاش لازمة يعني ما تخلى لقائهم شئ غير محسوب على المجرى الزمني لكل سلسلة و خلاص .. يعني مش دى الحاجة غير المنطقية الوحيدة اللى فى عالم السلاسل السينمائية عموما عشان لازم نعالجها و نشتغل عليها ..

رغم ان دول مالهمش علاقة بدول grin emoticon .. بس معرفش ليه حسيت بالكارثة المقبلة فى فيلم سوبرمان و باتمان السنة الجاية .. مهما قلتهم الاصل الروائى حلو - و انا قريته - بس التنفيذ و المعالجة السينمائية بتفرق ..

تابع القراءة

..بمناسبة ‫عيد العمال‬ عايز اقول كام حاجة متناثرة

بقلم : محمد فريد ...بمناسبة ‫عيد العمال‬ عايز اقول كام حاجة متناثرة كدة
1-عمال القطاع العام و شركاتهم اللي بتخسر و الصحف القومية و موظفين الحكومة احد اهم اسباب تشوه المجتمع ككل و ارسوا شوية اعراف منيبة بستين نيلة اهمها ان الشركة تكون بتخسر مئات الملايين و العمال بيطالبوا بارباح فالشركة تستلف عشان تصرف ارباح و علاوات و الدين يزيد و الفلوس تروح في ارباح لشركة خسرانة قالشركة تخسر اكتر و الموارد اللي المفروض تتخصص لخدمات تانية زي الصحة و التعليم بتكون راحت لسد احتجاجات العمال دول ، فيشتكوا تاني من سوء الاحوال المعيشية اللي بتسوء على المجتمع ككل مش بس كدة لا كمان عشان الحكومة تدبرلهم الفلوس تفرض ضرايب عالناس اللي هم المفروض بيشتغلوا و يكسبوا فبصورة مباشرة انت بتعاقب اللي بيجتهد و يتعب عشان تكافئ التنابلة
-قلنا ان ‫#‏الحد_الادنى_للاجور‬ مهم لكن وقت و طريقة تطبيقه كارثية ماينفعش ازود مرتبات بدون زيادة في الانتاج ، ما ينفعش اخد اعانات الخليج و احولها لزيادة مرتبات من غير زيادة في الانتاج لان السنة دي لقيت اللي حيسلفك السنة اللي بعدها مش حتلاقي، مش بس كدة زيادة الاجور دي حتعمل تضخم و غلاء على الناس في وقت البطالة معدية 13% رسمي و اكتر من 20% غير رسمي
وكل دة حصل
بس نقول ايه ‫#‏الشعبوية‬ تقتل
-قلنا ان ‫#‏الحد_الاقصى_للاجور‬ حيسبب هجرة كفاءات و حيودي القطاع الحكومي في داهية اكتر ماهو رايح و قلنا ان دة حيفتح باب خلفي للفساد
و قلنا لو الحكومة عايزة تنافس في السوق تمشي زي السوق ما بيقول لكن لو مصممين على حد اقصى الحكومة تطلع من القطاعات اللي بتنافس فيها السوق لان الكفاءات حتمشي و الشركات حتخسر
و حصل كل دة قاتل الله #الشعبوية
-عزيزي العامل المصري منعدم الكفاءة محدود القدرة اللي بس عمال تشمي و تتفذلك عشان ماتعملش مجهود . احب ابشرك انك معرض للانقراض كل يوم التكنولوجيا بتطور و بترخص و بالتالي الاحتياج في المستقبل حيكون لعمالة ماهرة مدربة جيدا و عشان تتعامل مع التكنولوجيا الحديثة وانت يا حلو حيبدلوك بمكنة بتشتغل قدك 10 مرات و بتكلف اثل منك الحق نفسك و بطل سلبطة و اتعلم تصون عيشك و نطور نفسك
و في النهاية احب اقول ‫#‏اللهم_لا_تأخذنا_بم_فعل_اليسارجية_منا‬ و هابي لابورز داي

تابع القراءة

العطاء القليل في رقمه المهول في فيمته

بقلم : Evra Morgan ... يوم الحَد اللي فات، واحد ساب في كنيسة ظرف تبرع فيه 18 سِنْت (الدولار = 100 سنت).
كنيسة First United Methodist Church في وسط البلد هنا بتقدم خدمة كل يوم حَد، تقدم وجبة لـ 150 مُشرَّد من السارحين في الشارع.
بعد ما خلّصوا خدمة اليوم لقوا في طبق التبرعات الظرف ده وجواه 18 سِنت سايبه واحد من المُشَرَّدين اللي كانوا حاضرين، ومكتوب عليه:
Please don't be mad I don't have much, I'm homeless. God bless
(رجاءً ماتزعلوش، أنا ماحيلتيش كتير. أنا مُشرَّد. ربنا يبارك)
الكنيسة أعلنت رسميًا من يومها عن شكرها لصاحب التبرع، وقدمت له دعوة رسمية يكشف عن هويته عشان الكنيسة تشكره شخصيًا وتساعده لحد النهاردة ماحدش ظهر.
لا زال التبرع - القليل في رقمه لكن مهول في قيمته - من مجهول.
---------------
وريت الحدوتة لأبويا، حكى لي حاجة شبيهة حصلت معاه أوائل التسعينات:
أول ما صَبَح قسيس، واحدة مسنة في الكنيسة عنده فضلت 5 سنين تدّي له كل أسبوع تبرع 3 جنيه، وتوصيه "جنيه ونُص لمباني الكنيسة، وجنيه ونُص لخدمة محو الأمية" لأنها كانت اتعلمت في خدمة محو الأمية إياها. ومانقطعتش السِت عن تبرعها إلا لما أبويا سافر أمريكا.
--------------
كتب خليل جبران في رائعته "النبي" ضمن ما كتب عن العطاء:
إنك إذا اعطيت فإنما تعطي القليل من ثروتك.
فإذا أعطيتَ من ذاتك أعطيتَ حقًا.
وهل الخوفُ من الحاجة إلا الحاجةُ ذاتها؟
بعض الناس يعطي القليل مما عنده من كثير.
أولئك يعطون تباهيًا بالعطاء، فتذهب نياتهم المستورة بطيبات عطاياهم.
وبعضهم لا يملك إلا القليل فيجود به كله.
أولئك هم المؤمنون بالحياة وما فيها من خير، فلا تفرغ خزائنهم أبدًا.
وبعضهم يعطي فَرحًا، وفرحته جزاؤه، أو يعطي مكابدًا، وفي مكابدته تطهيرٌ له.
وبعضهم يعطي ولا يحس مكابدة، ولا يلتمس فرحًا، ولا يدري أن العطاء فضيلة. أولئك يعطون كأنهم ريحان الوادي يبث عطره في الفضاء.
جميلٌ أن تعطي مَن يسألك، وأجمل منه أن تعطي مَن لا يسألك وقد أدركتَ عَوَزَه.
ما أكثرَ ما تقول: لَتَصْبُوَنَّ نفسي إلى العطاء، ولكن لا أعطي إلا مَن يستحق.
ليس ذلك قول الأشجار في بستانك، ولا القطعان في مرعاك. إنها تعطي لتحيا؛ لأن الامتناع عن العطاء سبيل الفناء.
مَن استحق أن ينهل من محيط الحياة لجدير بأن يملأ كأسه من جدولك الصغير.
فالحق أن الحياة هي التي تُعطي الحياة، ولستَ أنت، يا مَن تظن أنك مُعْطٍ، سوى شاهدٍ.

تابع القراءة